Blogia

o saputaz

Abril de reboluzions

Maitín ye 25 d’abril. En ixa mesma calendata, abe cuantos años (34 t’os que les faiga goi a esactitut), o pueblo portugués esbotó de libertat grazias a la Revolução dos Cravos (Reboluzión d’os clabels). Diz que se trata d’una d’as zagueras reboluzions romanticas, comenzipiando per que estió incruenta y perque fazió que s’emplisen de chen y de flors as carreras de Lisboa y altras ziudaz portuguesas. Amás, a reboluzión ba estar enzetada per o Movimento das Forças Armadas, una colleta de mandos intermeyos, os capitans, de l’exerzito salazarista que yeran fartos de bier como o suyo pueblo penaba en una angunia funda y trista.

Perque os portugueses y portuguesas s’eban chitau o día anterior sin brenca ilusión, como eba pasau de contino en una nuei que duraba ya 48 años. Meyo sieglo que empezipió a cambear grazias a dos cantas: "E depois do adeus" (que eba representau a Portugal en Eurovisión, güe icono d’o frikismo internazional) y "Grândola Vila Morena", de Zeca Afonso, que remataría combertindo-se en o imno ofizial d’a botinada y que se pasó en a maitinada d’o día 25 en o programa "Límite" de Rádio Renascença, a radio d’os bispes portugueses.

Asinas se podió ixuplidar a guerra colonial (con frens en Angola, Moçambique, Guiné, São Tome e Príncipe, Cabo Verde u Timor Leste), que eba costau a bida a rafolladas de chóbens (tanto portugueses como d’ixes países colonizaus), asinas como se perdión en o calaxo d’as barbaridaz istoricas lemas como o de "Do Minho ao Timor" u "Orgulhosamente sós", que esen estau ta redir-se-ne con ganas si no perque ban tener resultaus tan dramaticos.

Grazias a o Movimento das Forças Armadas, que comandaba chen como Otelo Saraiva de Carvalho, tot ixo cambió en un petén. De camín o pueblo portugués podió disfrutar con una libertat soñada que tasamén eban puesto alentar os más biellos en un periodo prou breu d’a suya istoria. Ya nian se’n alcordaban. Tanimientras, en l’altro estau peninsular encara ixalfegaba o dictador faxista y caldría asperar muito dica que a clamada transizión rematase. Una transizión que dixaría muitos problemas sin zarrar y, como presén, a un chefe d’estau bitalizio que eba eslechiu o propio dictador.

Pero en Portugal, a lo menos per un tiempo, os que eban estau encorrius podión tener a gran satisfazión d’engalzar (y mesmo atochar) per as costerudas carreras de Lisboa a os temius miembros d’a PIDE, a polizía politica salazarista. Prou que a reboluzión tendría as suyas aristas, as suyas idas y tornadas, pero a lo menos, tenión a oportunidat de soñar con a utopía y mesmo plegar-la a tocar, encara que fuese per un zarpau de días. Altros pueblos d’o mundo continan asperando güe, 34 años dimpués, o suyo propio 25 d’abril.

Deziba José Saramago fa bels años que sin o 25 d’abril, güe Portugal sería an que güe ye, u sía, con España, en a Unión Europea d’o capital. Tamién deziba que a os portugueses les eban dixau estar orichinals en a dictadura pero no les n’eban dixau estar en a libertat, tamién ye berdat. Pero, como deziba antes, a muita chen l’ese cuacau de poder bibir, encara que fuese per bels pocos días, encara que fuese nomás per una ora, a sensazión d’estar escribindo a istoria en primera persona.

Güe me fería goi de tributar un chicot omenache a José Afonso, l’autor d’o imno ofizial d’a Revolução dos cravos, y d’altras muitas cantas intresans y con mensache, como ista que tos dixo. Ye bien maja y de buen entender, nomás cal que parez cuenta de que malta ye una traza informal de clamar a la chen, bella cosa asinas como a basca en argot español.

Que la disfrutez y como se diz en Portugal... 25 de abril sempre, fascismo nunca mais!!

Quando a corja topa da janela
O que faz falta
Quando o pão que comes sabe a merda
O que faz falta

O que faz falta é avisar a malta
O que faz falta
O que faz falta é avisar a malta
O que faz falta

Quando nunca a noite foi dormida
O que faz falta
Quando a raiva nunca foi vencida
O que faz falta

O que faz falta é animar a malta
O que faz falta
O que faz falta é acordar a malta
O que faz falta

Quando nunca a infância teve infância
O que faz falta
Quando sabes que vai haver dança
O que faz falta

O que faz falta é animar a malta
O que faz falta
O que faz falta é empurrar a malta
O que faz falta

Quando um cão te morde a canela
O que faz falta
Quando a esquina há sempre uma cabeça
O que faz falta

O que faz falta é animar a malta
O que faz falta
O que faz falta é empurrar a malta
O que faz falta

Quando um homem dorme na valeta
O que faz falta
Quando dizem que isto é tudo treta
O que faz falta

O que faz falta é agitar a malta
O que faz falta
O que faz falta é libertar a malta
O que faz falta

Se o patrão não vai com duas loas
O que faz falta
Se o fascista conspira na sombra
O que faz falta

O que faz falta é avisar a malta
O que faz falta
O que faz falta é dar poder a malta
O que faz falta

XVenas Chornadas sobre as luengas d'Aragón

L’Asoziazión Cultural Nogará-Religada organiza as XVenas Chornadas sobre as luengas d’Aragón con un programa prou majizo. Se trata d’una oportunidat asabelo d’intresán ta debatir, charrar y chuntar-se con chen que luita per l’aragonés y per o catalán d’Aragón (ista zaguera, chen prou castigada en istes tiempos).

Tos animo a que tos i pasez. Todas as charradetas y autibidaz son arrienda intresans. Encara que si cal que’n acobaltemos beluna, sin duda ísta ye a charradeta de Juan Carlos Moreno Cabrera, un lingüista de reconoixiu prestichio internazional que s’ha caracterizau per esfender siempre a las luengas chicotas debán d’as enrestidas d’o nazionalismo lingüistico d’as grans fablas.

En iste enlaz i trobarez una entrebista bien maja que le feban en El Mundo.

Norabuena a Nogará per istas XV Chornadas, asperamos que tornen a estar un esito. Pasa-zos-ie!

Programa XV Chornadas sobre as luengas d’Aragón

Lunes 14 d’abril
Zentro Joaquín Roncal (carrera San Braulio, 5). 19 oras.
"Prochectos economicos y luengas minoritarias".
Con Prames, Chelats Sarrate (Alcampell), Idearte (onso Nabar).

Chuebes 17 d’abril
Zentro Joaquín Roncal (carrera San Braulio, 5). 19 oras.
"As luengas minoritarias y o turismo. O caso de l’Aragonés"
Con Gemma Fondevila (Echo) y David Bielsa (Chistén).

Biernes 18 d’abril
Zentro Joaquín Roncal (carrera San Braulio, 5). 19 oras.
"Lenguas, dialectos, hablas y nacionalismo lingüístico"
Con Juan Carlos Moreno Cabrera (catedratico lingüistica cheneral UAM)

Sabado 19 d’abril
Pza. San Bruno. 12 oras.
Clases d’aragonés en a carrera
"A situazión d’o chistabín y o belsetán"
Animazión y autibidaz

 

Cal una nazión ta cuadrangular

Leigo en A Nosa Terra que Catalunya, Euskal Herria y Galiza son organizando un campionato de basket de selezions absolutas (masculina y femenina). Se trata d'una d'as consecuenzias d'a Declarazión de San Mamés, que siñón representas publicos d'ixes tres países o pasau mes d'abiento.

Como que pareix que un triangular ye más embolicau d'organizar (caldría un sistema de "liguilla") que no pas un cuadrangular (que se chugaría con semifinals y finals), diz que son mirando de trobar una altra nazión ta que i chugue.

Dende aquí quereba proposar que contasen con a selezión aragonesa, que leba chugando partius con os suyos combinaus absolutos (masculino y femenino) dende l'año 2003. En a suya chicota istoria, as selezions aragonesas de basket han chugau partius contra equipos representatibos d'Estaus como Uruguai, Cuba, Chapón, Lituania y de bella comunidat autonoma española.

Aragón, que seguntes os textos legals ye una "nacionalidad histórica", u sía, igual como as comunidaz autonomas catalana, basca y gallega, cuenta amás con una istoria, cultura, luengas y mesmo un dreito propio. Aragón ye pues, una nazión, como cualsiquier altra, si bien no disposa d'o suyo propio Estau.

Si garra nazionalista catalán, basco u mesmo gallego no tienen mica problema en reconoixer que Oczitania ye una nazión, no puedo alcanzar a entender as razons que les fan ixuplidar-se d'Aragón.

Tamién ye berdat que os "nazionalistas" aragoneses no han gosau de fer guaires cosas como ta que os nazionalistas catalans, bascos y gallegos les biesen como "iguals". De feito, muitas begadas estoi que per o miedo "a o que dirán", s'han mirau de deseparar-sen d'els. M'ese feito goi de bier a bel representán d'o gobierno aragonés siñando a "Declaración de San Mamés" pero muito me temo que denguno d'os partius con representazión en as Cortes de Aragón tendría as ideyas tan esclateras como ta fer-lo. De feito, garra partiu que se presentó a las eslezions de 2007 demandaba a ofizialidat d'as selezions nazionals aragonesas. Tampoco no se podió bier a garra parlamentario aragonés (u sía, denguno, u sía zero) con a camiseta d'a selezión aragonesa cuan o tema se trató en o Congreso español, a pasada lechislatura.

U sía, que en primerías abríanos de fer a fayena en casa nuestra, ye zierto. Pero bueno, diz que a Copa de Europa estió empentada en primerías per Gabriel Hanot, editor d'o diario esportibo franzés L'Equipe, puestar que as iniziatibas de particulars, como güe d'O Saputaz, puedan plegar bel día ta bel cabo.

Ta qui se piense que o tema d'as selezions nazionals ye una fatera, que tamién en i hai beluno que asinas crei, que mire de pensar una miquina en o puyal de sentimientos que muebe güe l'esporte en o mundo. A emotibidat, como se deziba en os 70, tamién ye un elemento reboluzionario.

Una mosta: http://es.youtube.com/watch?v=ZepVRYzhJWs&feature=related

O saputaz rides again

Cuasi dos años han pasau dende a zaguer begada que o saputaz escribió en iste blog. A la fin, dimpués de tot iste tiempo, o saputaz se dezide per tornar per istes puestos birtuals ta reflesionar, comentar, endizcar y o que calga. Aspero, ixo sí, poder mantener zierta continidat y que no torne a pasar que o saputaz se fota altros dos años sin escribir cosa.

En iste tiempo emos puesto bier que pasaba cosas arrienda en o país nuestro... Eslezions, partius politicos que s'esboldregan, menazas con que Zaragoza sía siede de no sé que base operatiba d'a NATO, prochectos economicos que pretenden fer d'a estepa monegrina un megacomplexo turistico y d'o chuego (u sía, una macro Terra Mítica que tanto s'ha criticau per istes ronals), etc.

Merex a pena aturar-se ta charrar una miquina sobre isto zaguero. Ya tenemos un nuebo elemento de "consenso". Ya se sabe que en iste país d'as nuestras dolors entendemos os consensos como "adhesiones inquebrantables". U yes a fabor d'a Expo u yes un mal aragonés (per zierto, qui podeba estar tan belulo como ta creyer-se que a Expo iba a fer onra a la cultura aragonesa?? ) , u yes a fabor de Gran Scala u yes altro mal aragonés. En fin, bien se bale que güe mesmo s'ha apuntau a ista colleta de rebeldes o mesmismo Javier Lambán. Ya bieremos cuanto tarda en desdezir-se u matizar ista frase, azepto apuestas...

En fin, que o modelo que nos proposan ta desarrollar Monegros ye Las Vegas, con as suyas apuestas y tot o que biene arredol, amás de que quieren emplenar-nos de parques tematicos, os mesmos que criticábanos fa cuatro días cuan se feban a o canto d'o Mare Nostrum.

En fin, pues o saputaz, como en altras cosas, s'apunta a la disidenzia, se borra d'o "supuesto" consenso, se sale de l'estallo an que nos quieren ficar. Y que no nos biengan con o chantache d'o desarrollo. Conoxco arrienda chen monegrina que ye en contra d'ista barbaridat y que reconoxen que no les fa mica ilusión o prochecto.

Per altro costau, o que ye platero en isto de Gran Scala ye que no i hai cosa platera. Nos benden casinos, otels, parques tematicos, imbersions megamillonarias... pero o prochecto pareix tan, tan increyible que decamín s'esfa. No sé si m'entibocaré u no pas, pero per agora tot isto no ulora bien. De feito, no i hai alcuerdo (u ixo pareix) ta mercar os terrenos. Mesmo no se sabe ni an nos quieren clabar iste monstro!

En fin, que de seguro que'n iremos charrando a días benir, pero que per agora tot isto de Gran Scala ye más una estruzia ta encobaltar a bel politico y ta que a chen d'os Monegros se faigan alufras ta especular con a tierra que cualsiquier altra cosa.

Deziba en primerías que en iste Aragón nuestro han cambiau muitas cosas dende que O Saputaz dixó d'escribir en iste foro. Una cosa que no ha cambiau brenca ye a situazión de l'aragonés. Dos años dimpués continamos sin lei de luengas. O nuebo plazo pareix estar o prosimo berano. A berdat que yo ya me lo prengo a mofla. No que emos ascuitau isto tantas begadas! Biembenida fuese a lei (si plegase), encara que dimpués caldrá bier en qué situazión se dixa a l'aragonés y a o catalán y si a lei no se combierte en un nuebo barrache t'o desarrollo d'as nuestras luengas. Per yo, rai o que digan, fa tiempos que i dixé de creyer, en a quimerica (quimera d'o latín "chimaera", u sía "animal fabuloso" y no pas d'a palabra aragonesa "quimera", u sía, hate en inglés) lei de luengas.

Ta rematar per güe, tos dixo una canta t'animar-tos una mica, ye Corsário, de l'artista brasileiro João Bosco, una d'as mías cantas preferidas, que la disfrutez: http://www.youtube.com/watch?v=3h-w-IqmACw

 

Ye Temps de Franja

Temps de Franja ye o nombre d’una rebista aragonesa en luenga catalana (seguntes l’ABC: "revista catalana editada en Aragón", se beiga a menzión que’n fan os "hakademicos de l’aragonés": ye o nombre d’una rebista aragonesa en luenga catalana (seguntes l’ABC: "revista catalana editada en Aragón", se beiga a menzión que’n fan os "hakademicos de l’aragonés": http://www.acalaaragon.com/noticias/2005/09sep/20050921cartaeuropea/20051010ABC-Aragon-catalan/index.html ) que leba dando mal dende l’año 2000.

En as suyas pachinas se i puede trobar notizias arrienda sobre as comarcas aragonesas que s’esprisan en catalán y as chens que pueblan ixas encontradas. Tamién i colaboran aragoneses de luenga catalana que biben a l’altro canto d’a Ribagorza y que, altalle, disfrutan d’a normalidat de bier a suya parla reconoixida en toz os aspeutos d’a bida. U cuasi toz.

En es zaguers numers, amás, con o tema "calién" de l’aprebazión de l’Estatutet de Catalunya, i trobamos un buen zarpau d’articlos prou intresans, como a editorial de marzo, an que se i charra sin garra miedo d’o "dret a l’autodeterminació".

En os tiempos que corren, cuan somos asistindo a que Aragón, un altra begada más en a istoria, puede quedar-se en tierra mientres que altros pueblos espipan a las cuatro suelas, fa goi de leyer testos como os de "Temps de Franja". Charran sin tabú d’un dreito que a suya aplicazión ye embolicada y trabesera, denguno lo niega, pero que en Aragón pareix que esmentar-lo ye sinonimo d’estar un enemigo publico.

Amás, lo fan dende a "cucha" (que cadagún i fota a palabra que quiera: "ezquierda", "izquierda", "esquerra"... mesmo "zurda", yo ya soi una mica biello ta seguntes qué cambios), parafraseando a personas como Andreu Nin. On és Andreu Nin? preguntaban ta par de 1937 os miembros d’o POUM dimpués de que secuestrasen a ixe líder obrero. "En Roma o en Berlín", contestaban os moñacos ispanos de papá Stalin, acumulando-le a o bueno d’Andreu estar complíz d’os gobiernos faxistas que refirmaban a Franco. A la fin, Andreu morió en una checa, me-te-lo ban matar a limpia ostia os mesmos que dimpués perdión a guerra, asesinando de bez o sueño libertario de muitos pueblos, entre els de l’aragonés.

Aspero que o leutor u leutora sepan perdonar iste esbarre panfletero-istorico, pero como ya diz o soztítol d’iste "blog", iste "ziberdiario" ye "d’opinión y reflesión sobre Aragón, l’aragonés y o mundo". Y ya puez contar, sufriu/ida ziber-compañero/a de biache, que ficar baranas en o campo ye una fayena de mal fer.

Tornando ta os compañers/eras de Temps de Franja, leyer en Aragón, en una publicazión aragonesa, testos a fabor d’o dreito a l’autodeterminazión no pasa toz es días. U sí? Nian os que se consideran más aragonesistas se’n alcuerdan, d’ixe dreito, y mesmo i hai beluno que pareix que l’estorba más que no que le cuaque.

Per altro costau, Temps de Franja replega en pocas fuellas a istoria de amor/desamor d’una chen que se resiste a dixar de sentir-se aragonesa, encara que l’Administrazión aragonesa, y mesmo muitos d’os suyos compatriotas, fan toz os posibles per conseguir-lo. Que le’n pregunten a Susanna Barquín (http://susannabarquin.zoomblog.com/archivo/2005/11/07/dejenme-ser-aragonesa.html), que firma un prezioso articlo (de bez que un prezioso blog, plen de sentimientos y de sobrebuena prosa en catalán).

Me pregunto que feríanos nusaltros, os que miramos d’esprisar-nos millor u pior en ista chicota y castigada luenga (ya seiga per transmisión tradizional u recuperazión boluntarista, termino enzertadamén imbentau per Juanjo Segura) si contásenos con un país amigo, a l’altro canto d’una güega, que reconoixese toz os dreitos de l’aragonés. Els y ellas miran de luitar contra tot y contra toz, reibindicando en iste país surrealista y cainita lo que ye de chustizia. Nusaltros nian tenemos ixa oportunidat, somos apatridas lingüisticos. Estranchers y estrancheras en a tierra que nos beyó naxer.

En fin, que m’han feito muito goi os zaguers numers de "Temps de Franja" y que creigo que ixa chen que luita per o catalán se mereix que, encara que sía per estratechia politica, encara que sía per oportunismo (o mesmo oportunismo que fa a os españolistas refirmar os fueros de Nafarroa), les den una oportunidat dentro d’iste Aragón nuestro.

De lo contrario, somos empentando-les una mica entre toz y todas (entre toz y todas, sí) a que exerzan libremén o suyo dreito a l’autodeterminazión y soliziten que una altra Administrazión les comboye en o caminar.

http://www.amnistiacatalunya.org/educadors/docs/nu-civils-i-politics.htm

O futuro ye buestro

O martes se zelebraba a primera d’as charradas d’as XIIIenas Chornadas sobre as luengas d’Aragón, que organiza l’Asoziazión Cultural Nogará-Religada.

A chen que i fuemos, yéranos en candeletas, perque nos eban charrau d’as grabazions d’a curtida chen de Parola en Pandicosa. Os "Fernandos", una d’as parellas más produtibas y treballaderas que ha dau iste chicot mundet de l’aragonés, i eban puesto bier, u ixo diziban, que l’aragonés encara se i charraba.

Muitos nos pensábanos que sería un día interesán, perque de tan raro, nos parixeba mentira lo que nos contaban d’o panticuto. Fa tiempos que no nos creyébanos que Pandicosa fuese una mena de "isla lingüistica", perque se’n trobaba cosas raras a embute. U ixo se podeba entender (’replecar’ diría un altro) d’as esfensas numantinas que bel pro-ombre de l’aragonés común (¿u abría de dezir de l’aragonés más macarronico?) feba d’as suyas "troballas".

De tan raro, parixeba mentira que o pandicuto se charrase como belaún deziba. Ixe recau de xordas interbocalicas, de condizionals imposibles, ixas trigas raras y arcaizantes... Tot isto que no se beyeba ni en Echo, ni en Chistau, ni en Ribagorza, nian en Bielsa... Tot isto se trobaba, seguntes belaún, en a Pandicosa d’as estazions d’esquí, d’Aramón y d’os pijautos con bronzeau d’ibierno.

Tamién i eba chen que anunziaba a muerte de l’aragonés d’ixes entuxanos, belaún se’n feba a mofla en autos publicos, per a man d’a Ribagorza, y comentaba con o suyo salero abitual que igual mientres el charraputiaba, eba escrabutau bel golet... Como siempre, a fabla ye capable de tot, de lo millor y lo pior de nusatros mesmos y de conseguir que as ocurrenzias amanixcan a bando, per toz es cabos d’iste microcosmos d’a locura en o que nos emos capuzau.

Debán d’a espectazión, podiemos bier en os bideos dos cosas importans, plateras, pero importans:

a) O pandicuto se charra y tiene un buen libel de conserbazión, parellano u apaexiu a o d’altros dialeutos de l’aragonés. Perque ta qui quiera bier que dellá d’o condau de Ribagorza (antis más "Condato" esen dito) se remata o mundo, cal ubrir-le os güellos ta que beigan que l’aragonés se troba con o mesmo ran de conserbazión (mesmo con más) en lugars an que igual els u no i son estaus, u no han sentiu charrar ista bonica parla.

b) Encara que belaún s’enzerrine en esfender un pandicuto rarizo y alexau d’a reyalidat, iste aragonés ye ixo, aragonés. A entonazión, as frases feitas, tot ye aragonés que podría estar de cualsiquier altro cabo, pero de Pandicosa.

A charrada y o debate posterior estió prou clarificadera y tamién dixó platero que a chen que charran as modalidaz quiere a l’aragonés. No le pareix raro, ni fan güellos de caparra, cuan sienten parlastuquiar en iste aragonés común que tantas begadas ye estau despreziau, más que más, per es que lo fan serbir, lo que ye más grazioso. Les puede chocar, pero si l’aragonés común se charra con naturalidat, si ye una barián cautibada, si qui la emplega fa un chicot esfuerzo perque l’entienda o suyo interlocutor, no i hai guaires problemas.

Entre o publico i eba tensinos que nos charrón d’ixe azeto sabor que te dixa aber perdiu l’aragonés, aber perdiu bella cosa que ye tuya. Una yaya de Pandicosa que remeró como le foteban trucos cuan charrutiaba bella palabrichona en aragonés cuan plegó en Zaragoza, nos lo dixó bien platero: "Os chóbens son o futuro".